LA SIGNORA ITALIA MARRANGIO
(Ottavio Buonomo)
Sempe 'cu 'a scopa 'mmano!
Chisto è destino!
Bello però 'stu teatro,
piccerillo ma aggraziatiello,
mò oggi vene a pruvà pure chill'attore 'llà,
comme se chiamme?
Eh, chillo che ha fatto pure 'e programme 'pe televisione!
Io me ricordo quanno cantava 'e 'mmacchiette...
cantava mò...
'e 'ccante ancora!
E' giovane,
tenarrà 'na trentina d'anne!
Che schifo che hanna cumbinate...
ma comme camminano?
ma addò camminano?
Guarda 'ccà... pure 'e 'ggomme azzeccate!
A teatro mica ce stanno sulo l'attore!
Tu pienze...
Si a teatro tutte vulesseno fà ll'attore
se recitasse int'a munnezza!
Bì ipsilon,
Signora Italia
ovvero, per dirlo interregionale,
Mistrìs Italy!
Eh...
guarda 'ccà,
sempe chino 'e povere...
'sti teatre appena arapeno
già sò viecchie...
Però sò belle!
A me me piace 'e vedè 'o teatro!
Ce vaco sempe 'nzieme 'a cummarella mia...
ce facimmo 'nu cuofano 'e risate!
Io a 'e 'vvote ce vulesse purtà pure a maritemo,
ma chillo nun vò maje venì
e pecchè?
Pecchè s'adda vedè 'a partita!
Io capisco 'o Napule!
Ma chillo se vede pure 'o campionato olandese!
E mo dico io...
Gennarì, tu nun sì mai stato fore Acerra, Pomigliano e Casalnuovo
ma che tiene 'a vedè 'cu sti olandese?
Chillo dice...
Pecchè m'aggia jucato 'a bulletta...
Pecchè chillo dice
'ca si piglie 'a bulletta
pò pavà 'e 'bbullette...
e aspiette 'lloco!
Avessa maje pigliate 'na vota...
anzi no...
'na vota pigliaje...
l'unica vota 'ca 'ncarraje
è quanno sbagliaje a mettere 'o risultato!
Pò tengo 'e figli mieje!
'E figli mieje a teatro non ci vanno mai,
si sfasteriano... si si!
Uno... 'o maschio, sempe capa e videogioco!
Invece 'a femmena esce sempe
chi 'a vede maje...
Ve 'o 'ggiuro...
l'urdema vota che aggia visto a mia figlia
è stata quanno l'aggia fatta!
Pure 'o scotch azzeccato!
Ma dico io...
'sti 'ccumpagnie nun se 'mparano maje?
E io fatico...
Scusate giovanò 'ccà date fastidio!
Ma io sono il ragazzo delle poesie!
Eh, e date fastidio 'o stesso...
La poesia dà sempre fastidio, ha visto Pasolini?
No, aieressera m'aggia visto 'o Grande Fratello!
Non ci pensi!
No, maje 'na cosa 'e chesto... io nun songo proprio abituata...
Posso conoscere il suo nome?
Italia Marrangio!
E lavora in questo teatro?
Non sempre... non sempre...
perchè mò me faccio 'stu teatro,
doppo me faccio 'na chiesa,
stasera tengo 'nu palazzo
e 'a casa 'e n'avvocato...
Cultura, religione, popolo e giustizia...
Me pare 'o nomme 'e nu partito!
La poesia non può fare politica!
No, ma 'ncuollo 'a politica
se ponno fà parecchie poesie!
Bì ipsilon Signora Italia,
ovvero, per dirlo interregionale
Mistris Italy!
Cosa dice?
No, non ci fate caso, io sono Fuorigrotta!
Come?
Eh, parlo tanta lengue ammiscate!
Poliglotta!
Eh, comme avite ditto vuje...
Lei è dolcissima...
E tu si strano,
mo scusate
aggia ì int'e camerine,
scusate n'attimo,
facite fa...
Pure 'e scale mò,
tengo 'nu male 'e schiena stammatina!
'E camerine,
sò belle 'e camerine...
'e camerine...
l'unico posto addò fà friddo
pure quanno fà cavere...
Int'e camerine ce stà uno 'e tutte...
Io 'e 'ssento spisse 'e parlà quanno fanno 'e 'pprove...
la prova generale...
a 'e 'vvote se 'ncazzano,
jastemmano...
sbatteno 'e 'pporte...
stracciano 'e foglie...
dice...
'A vita 'e ll'attore nun è facile...
'O 'ssaccio...
e io che avessa dicere scusate?
Io 'e 'ssento quanno pò fanne...
Ce sta 'nu movimento, bello...
Si però, 'o teatro s'adda fà...
Dice...
Per favorire la cultura?
No, pe fà guadagnà qualcosa 'e sorde pure a me!
Bi ipsilon Signora Italia
ovvero, per dirlo interregionale,
mò andestenne vuje...
ripit, uit mì...
everibodi...
Mistris Italy!